Hollandiyada e-ticarətdə aldadıcı və haqsız əməllərə son qoymaq üçün 900 min avroya qədər sanksiyalar tətbiq ediləcək.
Bu barədə Hollandiya İstehlakçı və Bazar İdarəsi açıqlama verib. Qurumun verdiyi açıqlamada, e-ticarət saytları və tətbiqlərində saxta rəylər satanların ciddi cərimələrlə üzləşə biləcəyi bildirilib.
Tənzimləyici qurum indiyədək yalnız öz məhsullarını və ya xidmətlərini tanıtmaq üçün saxta rəylər alan və ya istifadə edən onlayn mağazaları cərimələyə bilirdi, lakin artıq bu cür rəyləri satanlar da hər qanun pozuntusuna görə 900.000 avroya qədər cərimə ilə üzləşə bilər.
Agentliyin açıqlamasında vurğulanıb ki, saxta rəylər istehlakçıların düzgün seçim etməsinə mane olur, onları daha uyğun olmayan məhsul və xidmətlərə yönəldir və qaydalara uyğun fəaliyyət göstərən saytlara qarşı haqsız rəqabətə səbəb ola bilər.
İstehlakçı departamentinin direktoru Edvin van Houten verdiyi açıqlamada:
İstehlakçılar satıcıları müqayisə edərkən rəylərə etibar edə bilməlidirlər. Biz yanlış əməllərlə mübarizə aparmaq və biznesləri və istehlakçıları maarifləndirmək yolu ilə onlayn fırıldaqları, aldatma hallarını azaltmaq istəyirik.
Qurum son aylarda həmçinin saxta “endirim taymerləri” ilə bağlı araşdırmalara da başlayıb. Belə ki, alış üçün təcili qərar verməyə sövq edən bu cür geri sayım taymerləri də alıcılar üzərində süni təzyiq yaradır.
Haqsız Kommersiya Fəaliyyəti Direktivi kimi Avropa İttifaqının (Aİ) qanunları da aldadıcı, yanıldıcı onlayn əməllərlə mübarizə aparmaqla istehlakçıları qorumaq məqsədi daşıyır. Son aylarda Avropa Komissiyası onlayn dünyanın normal oflayn mağazalar qədər ədalətli olmasını təmin etmək istədiyini açıqlamışdı.
Ümumilikdə müştərisi olmadığımız, alıb istifadə etmədiyimiz və keyfiyyətindən əmin olmadığımız mal və xidmətlərə müsbət və ya mənfi rəy bildirmək doğru deyil.
Onlayn ticarətdə məhsul və xidmətlər haqqında rəylər potensial müştərilərin qərar verməsində mühüm rol oynayır, onların işini asanlaşdırır. Lakin bəzi hallarda sahibkarlar və ya üçüncü tərəflər saxta müsbət və ya mənfi rəylər yazaraq istehlakçıları manipulyasiya etməyə çalışırlar. Bunun bir sıra mənfi nəticələriylə bağlı bəzi nüansları aşağıda qeyd edək
1. Yalan danışmaq haramdır
Saxta rəy yazmaq və ya rəy satmaq, alıcını bilərəkdən aldatmaq sayılır. İstehlakçılar təqdim olunan rəyləri məhsul və ya xidmətin real keyfiyyət göstəricisi kimi qəbul edir, lakin bu cür manipulyativ üsullar onların həqiqəti öyrənməsinə mane olur. Yalan məlumat yaymaq və insanları yanlış istiqamətləndirmək halal dəyildir.
2. İstehlakçı hüquqlarına və məmnuniyyətinə zərər vurur
Yanıltıcı rəylər istehlakçıların real ehtiyaclarına uyğun olmayan məhsullar və ya xidmətlər seçməsinə səbəb ola bilər. Aldadılmış müştərilər ya keyfiyyətsiz məhsul alır, ya da əslində yaxşı olan bir xidmətdən (verilən pis rəylərdən dolayı) imtina edirlər. Bu isə onların maddi və mənəvi itkilərə məruz qalmasına gətirib çıxarır.
3. Haqsız rəqabət yaradır və halal sahibkarlığa zərbə vurur
Bazarda ədalətli rəqabət mühiti sağlam biznes ekosisteminin əsas şərtlərindəndir. Saxta rəylər vasitəsilə müştəriləri cəlb edən satıcılar real keyfiyyət təqdim edən halal sahibkarları kölgədə qoyur. Beləliklə, dürüst işləyən bizneslər haqsız rəqabət nəticəsində zərər çəkir, bu da bazar iqtisadiyyatında qeyri-sabitliyə səbəb olur.
4. Ümumi iqtisadi və sosial fəsadlara yol açır
Bu cür qeyri-əxlaqi davranışlar geniş yayıldıqca istehlakçılar onlayn rəylərə etibar etməməyə başlayır. Nəticədə, ümumi ticarət mühiti pozulur, istehlakçıların etimadsızlığı artır və ölkə iqtisadiyyatına mənfi təsir göstərir. Bundan əlavə, bu yanaşmanın yayılması qeyri-etik reklam və marketinq üsullarının artmasına gətirib çıxarır ki, bu da uzunmüddətli perspektivdə biznes mühitini daha da çətinləşdirir.